香港游泳代表隊喺里奧有好成績，香港人打氣支持之餘，連工作機會都多咗。10月16號舉行嘅維港渡海泳為咗鼓勵一班泳將堅持同專注嘅香港精神，特別邀請被外媒盛讚係「東方維納斯」嘅歐鎧淳及5名隊友，齊齊拍咗輯與別不同嘅宣傳照。
小鮮肉謝旻樹騷肌
平時除女子韻律泳，一般泳將落場都好少化妝，但今次大會請嚟星級化妝師Zing同日籍髮型師今泉亮爾合作，再由攝影師Rex Tsui操刀，將一班飛魚最靚、最有活力一刻以黑白相呈現出嚟。其中鎧淳BB着起單肩兩件頭泳衣擺pose，仲望實鏡頭，真係電死人；而小鮮肉謝旻樹都大騷肌肉。
今次團隊放棄平日拍泳衣相必到嘅室內泳池，改為喺studio搭建小型水池，方便打燈拍攝。但因攝影棚器材多，要長期開住冷氣降溫，鎧淳BB落水時亦忍唔住大叫：「好凍！」
5位女飛魚今年會參加渡海泳慈善組賽事，但原來得江忞懿同施幸余有海上競賽經驗。江忞懿話游海港與泳池好唔同，「見唔到水底，但見到好多建築物」，而渡海泳多浪多人，需要更多即場應變能力。施幸余就話海水能見度低，要不時探頭出水認清方向。
李八方
mailto:[email protected]
