噚日高官聯合記招，財爺曾俊華眼神凌厲睥住CY，塊面仲黑過全盛時期嘅曾主席；財爺之後出席浸大中國傳統武術與現代社會研討會，頓時笑晒口動作多多，果然同武術巨星李小龍格言同出一轍，be water呀！
財爺通曉武術好多人知，原來涉獵範圍好廣，南螳螂、北少林都練過吓，不過最長時間都係學洪家虎鶴派，係貨真價實嘅洪拳弟子。作為喺美國自由社會生活咗20年嘅華人，財爺話習武講師承、授業，雖然封建，但都係特別經歷，亦係緣份。
主持問財爺武術對現代社會發展有咩啟示，財爺即刻露一手，變身太極宗師，笑住話「太深，唔識」，話自己只係練習者未夠班，希望教授多多探討。財爺走嗰時揮晒手嘴角保持向上，同個零鐘前坐喺政府總部開記招個樣好大對比。