新世界發展（017）主席鄭家純這天在集團業績會上，指集團90年代已購入橫洲多塊地皮，之後申請將地皮改用途，至今仍未如願，佢公開地說「我地都係苦主，何來利益輸送？」。但到晚上純官再不是苦主，皆因他的愛駒「大寶庫」在快活谷報捷。
第二場五班1800米，外號小鮮肉的年輕騎師史卓豐策葉楚航馬房「大寶庫」係全場最熱門，此匹七歲馬沿途守好位，末段加速輕勝兩個半馬位而回，為史卓豐打響個人今季頭炮，單Win及組合獨贏A2，分別派35.5及22.5元。「大寶庫」用行動贏馬氹主人純官開心，可惜純官唔在場，只由他人代拉頭馬。
訓練「大寶庫」的葉楚航，在今季已舉行的兩次谷草夜賽各贏一駒，上次佢係贏「可愛寶」捧盃。葉楚航指「大寶庫」今仗表現大躍進，因為改了操練手法，以往牠多數在內圈操，但對於這匹粗身大馬來說，似乎工夫未夠，今仗賽前特意頻頻安排牠在大圈操足兩個圈，試閘又力騎省到行，令馬兒輕晒身，故有好表現，希望牠的狀態保持勇銳，下仗繼續跑入前列。
呢場最低班賽前四名有熱有冷，其中二至四名分別為冷門「糖黐豆」、熱門「肯利多」及冷門「神光輝耀」，四重彩派一萬六千蚊鬆啲。