Ellispsoid joint、pivot joint同gliding joint呢啲骨骼結構，莫講中學生，大人都未必識，但係網上流傳咗一份綠茵英文幼稚園（馬鞍山）嘅英文工作紙（圖），卻驚現呢啲高深詞彙。
呢張工作紙喺facebook專頁「馬鞍山人，馬鞍山事」流傳後，嚇親唔少家長，其中一版用英文列舉骨頭構成、功能、斷骨原因同點樣處理，另一版就列出多個骨關節嘅英文生字，例如ellispsoid joint（橢球關節）同hinge joint（樞紐關節）等，大批網民炮轟校方揠苗助長，有人質疑練習程度過深，慨嘆幼稚園生「贏在起跑線，但未到終點死X咗！」仲有人戲稱香港幼稚園程度超英趕美。
八方問過校方，佢哋證實呢張工作紙喺興趣班用過，但最少已經係兩年前，唔係校本課程，「只係一啲資訊性畀小朋友」，強調呢啲興趣班鍾意先參加喎。