南華喺周二嘅亞協盃八強次回合作客以1:2不敵馬來西亞班霸柔佛DT，兩回合計輸2:3出局，球員噚日就收拾心情返香港，今日下晝復操，準備下周日對和富大埔嘅港超。
噚日問到南華教練列卡度，點樣睇球隊喺成個亞協盃嘅表現，佢就話：「球隊分組賽喺劣勢下最終出線，球員表現得好好。當然，佢哋都有唔少要改善嘅地方，但我認為佢哋已經將球隊嘅攻守企位、踢法等記咗入腦。球隊目前最需要改善嘅係點樣保持控球權，唔好咁易畀番個波對手。」
佢就認為，球隊嘅亞協盃陣容係有啲薄弱，本地賽有番謝家強同羅素等人，調動會靈活得多，又話本地市場可以搵嘅新球員唔多，所以最重要係令𠵱家嘅陣容發揮出最好表現。
梁冠聰感謝球會信任
至於今季先「上山」嘅梁冠聰，喺亞協盃八強兩回合都被委以重任踢正選左閘，佢就多謝球會嘅信任：「始終南華係大會，勝利係好重要嘅，球隊上季咁努力打入八強，我未踢過亞協盃，作為球隊新丁有正選已經好感謝球會。」
阿聰仲話，個人短期目標係喺南華爭到正選，長期目標當然係幫球隊贏錦標啦，而佢亦會喺陳偉豪、陳肇麒、朱兆基等大哥身上學習。
入選咗港澳埠際賽港足初選名單嘅阿聰仲有個希望，就係再次代表港足贏波！