上年與才俊李乘德（Philip） 結婚，胡杏兒進身幸福人妻行列，婚後繼續經常放閃大晒甜蜜。雖然講明做好生B準備，不過工作冇停手，早前參加內地節目《跨界歌王》 之後，這個月又完成在上海的舞台劇《我和春天有個約會》，忙還忙，杏兒並沒有忘記自己的人妻身份，「𠵱家真係會安排好啲，要騰一啲時間出嚟，因為𠵱家有另一半，你真係要對佢負責任。」
統籌：林妙萍
造型、撰文：陳蔚渝
攝影：郭賢興
攝錄：李祉澄、林德雄
化妝：Miko Wong of Cyrus Lee Team
髮型：Lorraine Lam of hair Culture
入行16年拍過無數電視劇集，不過舞台劇經驗就偏偏只有一次，「第一次做真係入行冇幾耐，嗰時真係唔係好知自己做緊乜。」
開心再戰舞台
相隔十多年，杏兒自言今次累積了更多經驗，加上有好的對手和導演，所以對於能夠參與，絕對是一件開心事，「呢個劇本其實今年二十周年，今次re-run有份參與都覺得好開心，我哋之前一直都好努力排練。」
演出一個大家熟悉的劇本，容易被觀眾拿來比較，所以演出的難度和壓力可能相對亦會更高，「之前好多前輩演過，我自己都希望可以演到一個屬於我自己嘅version，當然都要少少跳舞同唱歌，暫時嚟講都唔會覺得好大壓力嘅，自己準備好就OK。舞台劇好考功夫，你會收到即時嘅反應，因為觀眾坐喺你隔籬，亦都好玩在你唔會知道嗰日你嘅對手點做，觀眾有乜反應，每一次做都有新鮮感。」杏兒忙完這個舞台劇，之後又會在內地接拍劇集，不過講明會盡量預留時間給另一半，盡人妻本份。
享受歌唱舞台
近年不少港星都北上參加真人騷，今年杏兒參加了唱歌節目《跨界歌王》，更多次成為話題人物，「其實個節目都幾辛苦，一個禮拜要上去四日，每一集都要準備兩首歌，有啲歌佢哋怕唔熟悉，所以佢哋會想我揀啲佢哋熟悉 ，而我唔熟悉嘅歌，所以有一定難度，雖然好辛苦，但都係一件好玩嘅事。」
不少圈中人都以夫妻檔上陣，並在真人騷大晒恩愛，問到杏兒會否考慮與Philip 一同參加，她說：「之前都有人邀請過，但係我老公唔係圈中人，又唔係好識得講普通話，所以應該都未必會。」
樂為老公下廚
杏兒雖然婚後繼續忙，不過閒時經常為老公下廚，「對我嚟講，煮嘢食係一個幾減壓嘅方法，我可以好投入去準備，佢又開心，係一舉兩得。」另一半對廚藝的評價？「佢覺得OK㗎喎，其實我都幾大膽嘗試，譬如好多嘢我冇整過，跟住個食譜我都夠膽整，就算睇落好似好難，佢都好鼓勵我嘅，如果有乜地方唔好佢會同我講，咁下次就會知道，其實廚藝都要一點一點累積。」不過她笑言老公就沒有為她下廚，「佢就比較傳統，鍾意食多啲。」
對於大家經常追問何時造人，杏兒表明絕對是計劃當中，「總之完成手頭上嘅工作就會，我都好期待，我都希望會係一個大家庭嚟嘅。」
【最愛中性打扮】
杏兒每次現身出席活動，多以女人味造型示人，不過私底下原來最愛中性打扮，「我鍾意西裝褸，好oversize嘅嘢，平時出活動好難着到好有型，都需要打扮得女仔一啲。如果你問我屋企最多係乜，一定係西裝褸同恤衫。」
更多精采時尚內容，盡在 http://add.appledaily.com 。