這晚快活谷賽事，來來去去嗰幾個騎練贏馬，其中練馬師姚本輝頭場「馬狀元」及第五場「開心有你」起孖後未夠喉，第六場三班1200米，佢以楊明綸操刀「陀飛輪」再下一城，今場單Win及組合獨贏A1，分別派62.5及24元，成為今季首位谷草中三元練馬師，三駒獨贏三串一過關十蚊注收23,235元，十分和味！
姚本輝整晚笑口噬噬，開心到飛起，跑完呢場佢更可以提早返屋企慶祝，皆因餘下兩場佢都冇馬出。「陀飛輪」賽績幾得意，來港三季每季都只贏一場，好似識自行調整評分至適當水平出擊咁，而且馬兒性格亦十分貪玩，今場守好位下大勝近三馬位，過終點時不知牠high得滯抑或想避開影子，成隻馬跳起四腳凌空離地，幸好楊明綸身手敏捷保持平衡，無發生意外。
「陀飛輪」累積三捷均由楊明綸勝出谷草1200米，堪稱最佳拍檔。姚本輝話一直對「陀飛輪」好有期望，而事實上此馬跑快活谷很穩定，今仗騎師依足策騎指示，發揮值得一讚。
今場「手到拿來」靠放得第二，力保一席連贏配腳，鞍上人祈普敦首次在谷戰上名，三、四名順序為「有心人」及「星光大師」，四重彩派七萬二千幾。三T有人中正獎，每十蚊注派2,260多萬元。