以安歷卡同奧華馬斯為始，亨利同皮利斯達頂𥧌，法比加斯同尹佩斯延續，嚟到如今奧斯爾同阿歷斯山齊士嘅時代；從高貝利到阿聯酋，阿仙奴球員如流水般的兵，惟獨鐵打嘅雲格安坐場邊。今日係秋分，喺20年前嘅今日（1996年9月22日），係一個時代嘅開端：阿仙奴宣佈委任雲格（右）為領隊。
英超失去費格遜後，更珍惜雲格嘅屹立不倒，眼看呢幾年曼聯嘅動盪，更覺雲格比想像中偉大同艱難。雖然外界成日寸佢英超年年第四、歐聯年年16強出局，但有邊個領隊可以穩定地帶到一隊波季季踢歐聯？雲格除咗係成績嘅保證，仲一手領導阿仙奴改革，由傳統英式踢法變成歐陸嘅地面進攻。經過呢20年，華麗足球嘅基因已深入阿仙奴血液同骨髓。
雲格一年比一年老，係難以改變嘅現實，兵工廠總要面對佢老人家退休嘅問題。三軍易得，一帥難求，好領隊難尋。小弟好擔心嗰日來臨時，阿仙奴面對嘅情況比後費格遜時代嘅曼聯仲混亂；最唔想見到嘅係一啲唔夠班嘅領隊，將雲格留落嚟嘅好球員同華麗風格糟蹋。
小弟一直認為雲格最好嘅接班人係哥迪奧拿（左），家陣哥帥喺曼城風生水起，但佢教阿仙奴的話，更加如魚得水，首先阿仙奴踢華麗足球嘅根基比曼城深厚，其次雲格一直慳住使，應該留番唔少資金畀下任領隊增兵，可以滿足到哥帥嘅要求。小弟有想像過，哥帥將現時嘅阿仙奴提升到新嘅高度，之後雲格坐喺包廂入面，心滿意足咁望住哥帥將佢嘅兵工廠發揚光大。不過現實中，曼城點會咁輕易放走哥帥，唉！文：咖喱