受惠於巨額電視直播合約，新一季NBA球員人工亦水漲船高，連小市場球隊都要高薪留人，好似公鹿就開出總值一億美金（約7.8億港元）嘅四年合約，留住「字母哥」G安迪度安寶（Giannis Antetokounmpo）。呢位希臘小前鋒未夠22歲，已經搵到人生第一個一億美金，都可算係苦盡甘來，事關佢一家都係尼日利亞難民，當年父母帶佢哋四兄弟逃難去希臘，老竇喺農場打工搵唔到幾多錢，幾兄弟做童工幫過佢手摘橙，G安迪度安寶又去過遊客區賣太陽眼鏡搵錢，好彩𠵱家都算名成利就。
NBA今夏有好多過億合約，最貴係灰熊後衞干尼（Mike Conley）份合約，總值1.5億美金（約11.6億港元），不過美國ESPN就預期，好快出現兩億美金（約15.5億港元）合約，仲列出成為「兩億男」條件：至少10年年資、未過31歲、喺之前效力嘅球隊已超過五年兼拎過大合約，綜觀現今球員，最大機會係雷霆後衞韋斯卜克（Russell Westbrook），雖然剛同雷霆續約，不過2018年可以跳出合同成自由身，到時就拎到兩億合約，其他人選就有快艇中鋒D佐敦（DeAndre Jordan）、火箭後衞夏登（James Harden）。