「國際大鱷」索羅斯喺股市叱吒風雲，私底下有顆樂於助人嘅善心。佢噚日話捐5億美金（近39億港元）畀歐洲難民，幫佢哋做生意。外界成日話索羅斯係魔鬼同天使嘅化身，可能係另類「發財立品」。
過去37年來，索羅斯做善事出錢又出力，仲成立非牟利組織開放社會基金會（OSF）兼出任主席。索羅斯話，今次捐錢係響應美國總統奧巴馬「call to action」計劃呼籲，佢好想幫助歐洲難民同新移民創業，搞吓初創或者開公司。而所投資都屬於OSF旗下，即係點都有大鱷睇住啦。
索羅斯咁熱心幫助難民，可能同佢親身經歷有關。86歲嘅索羅斯係匈牙利猶太人，當年二戰期間見到德國納粹黨佔領，好彩佢哋全家人辦到假證先保住條命仔，最後走難到英國。