周三(21日)快活谷各場各駒中，這天賽前一天最後備戰，只得一駒由外籍騎師親操，就是田泰安試「英明神駒」，喺內圈踱步。
苗禮德馬房「英明神駒」列陣第八場三班1650米草地，此駒上季在港戰績全無睇頭，今仗復出睇怕都唔會係熱門，不過要留意隻馬唞暑之後，其實大有進步，積極操練頻頻由田泰安親試不在話下，本月初試快活谷閘，轉彎好流暢，刻意省一省在前列歸來跑第二，落腳輕爽步頭有力，早已為今仗初跑快活谷做足準備。
「英明神駒」來港前曾由蘇銘倫贏1800米表列賽，上季插二班87分太高兼未適應水土才無表現，如今71分已減一大截，今朝更見苗禮德、田泰安傾咗好耐，呢對好拍檔可以話有晒搏殺手影，有力為馬兒取得突破成績。