年年都要採訪哈囉喂鬼屋，真係食定驚風散都唔夠俾人嚇，估唔到今年終於有機會反擊。海洋公園日前邀請八方在內嘅一班行家齊齊做「嘩鬼實習生」，同成班高層一齊扮鬼扮馬，體驗嚇人有幾好玩。
八方首先到嘩鬼大本營「猛鬼化妝間」，由荷李活級特技化妝師整番個恐怖妝，用噴槍極速上妝，10分鐘唔使就搞掂。園方再安排兩個有豐富經驗嘅「老鬼」搞嚇鬼雞精班，由行路到表情與動作都要學一次。
去到人來人往嘅海濱廣場，成班海洋公園高層好似主席孔令成、前主席盛智文已經粉墨登場，準備好一齊嚇人。最爆嘅要數副主席劉鳴煒個夜魔石獸Look，足足用兩粒鐘化妝，唔只上咗厚粉，仲要戴頭套同貼魔鬼角。但依然有人認到佢個package，爭住同佢影相。
劉鳴煒：要用好多energy
今年海洋公園首度推出「我要做嘩鬼」訓練營，等遊客可以親身落場體驗嚇人樂趣。劉鳴煒話扮鬼係減壓好方法，舊年都有玩，但每次都要用好多energy入戲，有時會影響翌日工作表現，所以今年會玩少幾日，但話一有機會，或現身指導吓嘩鬼實習生喎。