舊嘅唔去、新嘅唔嚟，新一屆立法會議員將會喺下個月12號宣誓就職，睇番佢哋個排名名單，真係令八方百感交集，因為排第一、以及倒數第一嘅議員，各自係曾經同埋現時最年輕嘅議員，時光荏苒，唔少行內老鬼或者都好感慨！
岳少由70跳升43
現屆立法會入面，排名最先嘅議員係「仁人」，即係民主黨何俊仁同工黨李卓人，但隨住佢哋都退下火線，新一屆嘅「冧巴溫」就係家陣排緊第3嘅民主黨涂謹申。想當年，即係1991年，阿涂以28歲之齡成為香港史上最年輕嘅議員，估唔到家陣變成立法會內最老資格嗰位。
至於現屆排第70嘅就係公民黨岳少楊岳橋，事關佢都係今年初新東補選後先入局箒。但經過大選後，佢唔再係新丁喇，一跳就跳到第43。取而代之排第尾嘅，就係破咗阿涂嘅紀錄，以23歲入局嘅香港眾志羅冠聰。大家唔好以為秘書處蝦聰聰細，就排佢第尾，實情個名單係先按議員連續任期長短排序，然後再按中文姓名筆畫數目排，就係咁，一共45畫嘅聰聰就排得後過一共37畫嘅公民黨譚文豪喇！
至於宣誓安排，同有港獨思潮之前似乎分別唔大，總之提咗誓詞樣本，同埋叫議員揀吓係咪以宗教儀式宣誓。當然亦溫馨提示，議員若未按照《宣誓及聲明條例》（第11章）嘅規定宣誓，不得參與立法會會議或表決。唔知一眾港獨派候任議員，會唔會喺宣誓時有奇招應對？
李八方
mailto:[email protected]