近日閱報得知本港初中的中國歷史課程正在審議中，有關人士恐怕本土新左翼年輕議員對課程有異議，在立法會提出質詢，另生枝節。
老實講，以吳克儉局長民望及公信力之低，教育局官員多年來對中國歷史課程之不重視，議員們故意留難的話，吳局長個人歷史修養成疑，教育局官員又支援不足的話，吳局長實在難以「感覺良好」，在立法會過受難日都似。佢算好彩，立法會中對中國歷史最熟悉嘅黃毓民議員已經落選，新科議員對中史認識應該與毓民相差甚遠，或者問唔到最尖銳之處啩。
同一時間，睇到中大歷史系榮休教授蘇慶彬嘅訃聞及新亞書院嘅訃告。蘇教授就是左丁山嘅老師，當年新亞學生必修中國歷史課，肥佬不能畢業，課程分文、理、社商三學院上課，歷史系主任孫國棟先生教文學院中史，蘇老師教社商及理學院，課程內容無硬性規定，課本就當然係錢穆先生之「國史大綱」及「中國歷代政治得失」，輔之以呂思勉及傅樂成倆嘅中國通史讀本。蘇老師俾分要睇平時分（抄筆記）及考試，碰啱左丁山成日去咗學生會開會，走堂如家常便飯，抄筆記抄鬼咩，心生一計，就問最叻抄筆記嘅同學借筆記嚟抄（培正、培道、真光、寶血啲女學生抄筆記最準最詳細），就問一位培正女生借到，點知佢嘅筆記以蠅頭小楷紀錄，鉅細無遺似足錄音機，左丁山抄到喊，唯有大幅刪改，求其了事，好彩自己在中學時已熟讀「中國歷代政治得失」，刨歷史教科書乃自己所長，考試冇難度，得到甲級，仲得到蘇老師讚咗幾句。
蘇老師於2016年9月9日於美國家中安詳辭世，9月16日下午在紐約舉行葬禮，享年85歲。佢係新亞文史系1956年畢業生，1958年新亞研究院畢業，師從錢穆，牟潤孫及嚴耕望三位歷史學大師，1974-76年擔任新亞歷史系主任，主治中古史及清史，曾受錢穆先生囑咐，用多年時間完成一本一千二百餘頁，分上下兩冊之「清史稿全史人名索引」，重要著作有「兩漢迄五代入居中國之蕃人氏族研究」，今一旦辭世，實為中國史學界之大損失。蘇老師一生熱愛新亞，去年捐贈200萬港元成立「蘇慶彬教授新亞書院歷史系獎學金」，今年9月臨終前囑咐懇辭花圈倘有帛金，撥五十萬元作「新亞書院歷史系一年級新生入學獎學金」之用，不敷之數由家屬補足。蘇老師生前門生故舊，如送帛金請存入恒生銀行024-775-159643-001何淑珍師母戶口。