噚日開記者會提出的士裝攝錄機嘅推動的士發展聯會委員李超凡（圖），原來大有來頭，當年有的士大王之稱，因為金融風暴破產，沉寂多年後又出嚟為的士業發聲，似乎有意東山再起。
李超凡中五畢業後投身社會，最初做信差，考到的士牌就去車行打工，兼職揸的士，搏殺幾年儲到錢就買入第一個的士牌。80年代的士牌價不斷上升，佢不斷向銀行借錢買入更多的士牌，到1997年回歸前，佢間日昌車行有成百部的士，佢亦被稱為的士大王，1995年仲獲選為十大傑青之一。
點知一場金融風暴令的士牌價暴跌一半，佢被銀行追債3億，1999年破產。破產令到2005年解除，佢就同朋友合作再搞的士，但一直低調，近日政府突然宣佈再發牌做豪華的士，的士牌價大跌，李超凡此時重出江湖，唔知有無關係？