現年51歲的曾華倩近年甚少現身幕前，做全職媽媽照顧17歲大寶貝仔林浩賢（Martin），前日讀者李先生透過本報「爆相爆片」，分享他在尖沙嘴海港城發現華倩與囝囝「拍拖」逛街照，其間華倩更巧遇陳豪與陳茵媺一家大細，幾個人站着寒暄了一會。
當日戴着黑超、便服打扮的華倩，雖然只化了淡妝，但皮膚及身形皆保養得宜，絕對有當美魔女條件。至於今年只有17歲的Martin，目測身高已超過6呎，不但高過媽咪一個頭，算是高佬的陳豪身高也不及他。
囝囝表現尷尬
李先生透露，當時陳豪一家在商場客戶服務中心查詢，剛好華倩與囝囝經過，眾人就寒暄幾句。李先生說：「曾華倩見到陳豪嗰陣，都有啲愕然，之後佢就好熱情咁介紹隔籬個男仔（囝囝Martin）畀陳豪認識，佢一路講，一路摸個男仔條腰、又拍佢pat pat，搞到個男仔都有啲尷尬！」
華倩於1996年與拍拖四年的林肇基結婚，惟婚姻維持了六年便離婚收場，當時Martin只有3歲，華倩亦從此母兼父職照顧囝囝，她也自認以嚴厲方式管教囝囝，同時又為自己無法給予囝囝一個完整家庭而感到內疚，幸Martin不負她厚望，成功入讀喇沙書院，更成為游泳健將。
採訪：李察
