秦沛前妻、亦即係姜文杰同姜麗文親生媽咪梁盛子，喺香港時間上周六喺加拿大溫哥華突然因腦溢血病逝，終年60歲。梁盛子出道時喺尖沙嘴夜總會唱歌，出過唱片同拍過電影，89年同秦沛離婚後簽約無綫，拍過《淘氣雙子星》同《家山有福》等電視劇。佢現任丈夫係律師Chris Ho，二人有一個25歲嘅仔。梁盛子移居溫哥華後有教唱歌，佢學生張景淳噚日喺Instagram透露恩師死訊，而上個月訪問過佢嘅港台DJ車淑梅，噚日亦喺facebook透露梁盛子離世消息。
遺願獲仔女諒解
車淑梅噚日同馮仁昭話：「係GiGi姐（黃淑儀）打畀我話我知，係加拿大時間星期六嘅事嚟！」淑梅話之前訪問，梁盛子話過當年仔女仲細，自己其實唔應該離開屋企，淑梅話：「佢好掛住對仔女，最大心願係得到兩個子女諒解，可惜呢個心結，未及解開，佢已經唔喺到。」
秦沛、姜文杰同姜麗文噚日都熄咗電話未能聯絡到，而秦沛細佬姜大偉就話：「梗係突然啦，佢唔係好大年紀咋嘛！」梁盛子同秦沛一對仔女係咪冇乜聯絡？姜大偉就話唔清楚，自己同梁盛子都好少聯絡。
撰文：馮仁昭