曾華倩前日喺海港城同囝囝林浩賢（Martin）行街，咁啱遇到陳豪夫婦，寒暄幾句say拜拜仲攬實Martin條腰走。睇真啲，曾華倩囝囝原來係位巨人，無論係拍埋曾華倩定係陳豪到，都高出成個頭！睇番資料，Martin 14歲時已經高186cm，再對比陳豪185cm身高，粗略估計Martin應該有2米高。
Martin呢副出眾嘅身材，原來係喺泳池練番嚟，至於學游水原因就要多謝媽咪曾華倩。曾華倩13年接受《蘋果》專訪時話過：「我好希望Martin學識游泳，一來自己唔識，二來游泳係一種求生技能。」（相關新聞: http://bit.ly/2cQ84St ）就係咁，Martin搖身一變成為游泳健將。
Martin係泳壇戰績彪炳，佢就讀名校喇沙，仲係學校泳隊主力，主攻50米同100米自由泳，曾經喺12年個屆學界水運會連奪3金。直至14年出戰乙組，亦喺50及100米自由泳、男子4x50米自由泳接力奪金，為學校贏咗當屆乙組冠軍。
除咗學校比賽，Martin個人賽都好出色，上年全港運動會佢就代表九龍城出戰50米自由泳決賽，只係以0.02秒之差失落金牌，最後成績係一金一銀。