八方相當年：
日食一隻蛋　童年飛天朱餓到暈 - 李八方

近期經常爆seed鬧特首梁振英嘅前港區人大代表朱幼麟，飛天之餘亦愛揸哈利電單車，佢話永遠唔會忘記當年由香港揸電單車到上海，意志力驚人，皆因細個捱過苦，耐力有番咁上下。

現年72歲嘅飛天朱有兩個哥哥同兩個姐姐，身為孻仔嘅佢憶述喺上海時生活困苦，「試過一日食一隻雞蛋，肚餓到暈」，由於饑腸轆轆，基本生活都未有，所以冇乜童年玩樂回憶。
14歲舉家由上海移民美國，人生路不熟，佢話幾坎坷，「好似低人一級咁」。當年喺波士頓Cambridge Latin High School讀中學時，喺旁邊嘅哈佛飯堂洗碗賺錢，最後用筆錢買架單車送畀自己，點知落地冇耐就被偷，諗番都好心痛。

唔識ABC　苦讀考第一

佢話當年喺美國第一日上堂，真係ABC都唔識，苦讀下竟然考第一，16歲中學未畢業已獲Northeastern University收錄，佢話當年讀書都係為咗畢業後搵到份工，讀電子工程因為那些年中國人唔可以管外國人，所以唔揀工商管理。
讀碩士後佢做咗工程師，再喺1975年到哈佛大學讀工商管理碩士，兩年後畢業，喺三藩市美國銀行打工，同年調返香港，之後涉足政商界。唔少人都知新地郭炳聯係飛天朱哈佛同學，佢笑笑口話：「我教佢學揸電單車㗎，不過佢學得好慢，哈哈。」佢哋仲一齊學過揸飛機，但上咗幾堂就冇上咯。