呢排零售市道好番少少，前華姐冠軍、九倉（004）靚女執董凌緣庭（Yen）都積極露面，幫尖沙嘴海港城宣傳，谷人流同生意。噚日海港城就舉辦BE@RBRICK展覽揭幕禮，阿Yen原本約好一班記者，喺典禮開始之前一個鐘做訪問，點知佢竟然遲到超過半粒鐘。唔係因為化妝、set頭而遲到吖嘛？
阿Yen嘅助手就解釋，凌小姐只係開會遲咗（又係呢個例牌原因，管理層遲到、早走都係因為開會），佢話，凌小姐俾老闆捉住咗喎。其實阿Yen已經係執董，佢老闆冇乜邊幾個，即刻講緊九倉主席吳天海喇。無論點，約咗人遲到就唔好喇。
講番BE@RBRICK時裝藝術聯展，喺即日至下月中，橫跨成個十．一黃金周舉行。阿Yen話，商場客路好廣，除咗之前用合家歡卡通人物做宣傳，今次用另類少少嘅BE@RBRICK，應該吸引唔少本地或者遊客Kidult鍾意。