曼聯喺周日英超作客輸畀屈福特1:3，錄得三連敗，明眼人都知朗尼同保羅普巴廢到爆，但曼聯主帥摩連奴賽後插邊個？真係估你唔到，竟然係左閘勞基梳爾！無他嘅，朗尼同普巴係兩個唔插得嘅人，但又要搵人祭旗咯，咪犧牲吓梳爾囉。
前曼聯領隊費格遜最大嘅成就係乜？咪樹立咗好多紀錄畀後人去破。莫耶斯同雲高爾已經破咗唔少，呢次輪到摩連奴打破封塵30年嘅紀錄，輸畀屈福特。費格遜任內未輸過畀屈福特，上次曼聯輸係1986年嘅事！三連敗之餘仲破埋恥辱紀錄，摩連奴可能覺得插球證同賴冇運已經唔能夠平怒，佢仲點名批評梳爾，摩佬話：「我哋所失嘅第二球波，岩拉伯特（屈福特翼鋒）喺右邊拎到波，我哋嘅左閘（梳爾）同佢相差25米。如果差25米，應該要去迫對手，但我哋嘅人冇咁做，而係企喺度等。」摩佬想搵梳爾祭旗之意明顯，但喺踢得差過梳爾嘅人大有人在，例如朗尼同普巴，點解摩佬又唔提呢？
插普巴等於插自己
朗「肥」呢場冇腳好波，成日甩腳，毫無貢獻，普巴就剩係識帶，完全做唔到一個稱職嘅中場指揮官，絕對稱得上為兩大罪人。我求大俠呢啲鍵盤俠何德何能，一定唔夠摩佬識波，我都睇到嘅野，佢點會睇唔到？但當我考慮到基本嘅辦公室政治理論嗰陣，就即刻明晒：老闆領嘢，搵人祭旗，包庇親信，處死卒仔。普巴係摩佬話要買嘅，算得上係親信，如果插普巴咪等於插自己，所以普巴唔鬧得！朗尼係更衣室領袖同埋英格蘭隊長，得到全英名宿同傳媒嘅盲目支持，得罪朗尼基本上等於等罪英國球壇，摩連奴又點敢插？咁冇乜背景、加盟唔太耐、又係前任收購嘅梳爾唯有硬食啦。
踢法被批同舊帥一樣
賽後唔少人都評論曼聯失利嘅原因，有人話曼聯進攻問題冇改善，個個前場球員企喺度踢波，冇人走位，場面同前領隊雲高爾嗰陣一模一樣咁悶；當落後要追嗰陣摩連奴都剩係識叫人傳中斬高波，方法同另一位舊帥莫耶斯又係一樣。亦有啲球迷好有建設性，幫摩連奴諗計，認為普巴唔適合派牌，要求摩佬摒棄前嫌，用番舒韋恩史迪加喎！不過摩連奴咁要面，我求大俠覺得佢重用「小豬」嘅機會唔大。