左丁山上星期寫過，朱凱廸、羅冠聰、游蕙禎等新科議員，會拖特區政府發展新界大西北，以後開發土地更加困難，變相助長樓價向上。有幾位老友來電話鬧左丁山過份武斷，對朱羅游三人產生負面效應；呢啲係個人意見啫，立法會在十月復會之後，大家慢慢睇可也。朱凱廸聲稱受生命威脅，向警方報警，係正確做法，香港到目前為止，仍係法治之地，與內地及台灣不同，如有人真的向立法會議員動殺機，其心可誅之餘，警方亦必將其人繩之於法，香港橫睇掂睇都唔係1999年之前嘅澳門，點可能有黑幫橫行，公然開槍殺人傷人呀。在任何一個地方，謀害國會議員、立法委員，都係政治上頭等大事，招惹公憤，目前香港如有人膽大包天，真的動刀動槍對朱凱廸一家不利，梁振英、黎棟國、盧偉聰要負全責。另一方面，朱凱廸驚到話要一家入住立法會，就係反應過龍，立法會主席唔會批准，朱凱廸家人若然住在立法會內，點會有正常家庭生活呀，負面心理影響會好大㗎。
一位資深測量師喺中環見到左丁山，就坦白咁講，佢對姚松炎當選建築、測量、規劃及園境功能組別更加失望，唔明白全國政協林雲峰點解出嚟𠝹票，令謝偉銓遭遇滑鐵盧，令姚松炎漁人得利，佢話中聯辦既然大力提拔新契仔契女上位，點解唔為CY勸退林雲峰呢？呢位測量師話佢見到朱凱廸、姚松炎合流就頭痛，陳茂波更可能瞓唔着，洪水橋發展大計受拖延，一啲都唔奇。聽佢講，成功、規模大嘅測量師行一致支持謝偉銓，但林雲峰在建築師界搶去選票，變咗攬炒。呢個界別之失，CY特別無癮，以後失咗一個可靠可信嘅放風及試水溫渠道，令土地政策之醞釀過程，甚不順暢。
不過即使順暢又點吖，發展新市鎮（新界大西北、洪水橋）首要建橋築路，平整地盤呢啲土木基建，但目前工人空前缺乏，根本難以招聘，工程因此必受延誤，唔唱慢板唔得。港珠澳大橋幾乎已肯定延遲落成，如能按目前公布嘅時間表啟用，乃是奇蹟。有一位工程顧問私底下指出，如果唔輸入幾千名外來建築工人，以後十年八年嘅大型工程延誤就是家常便飯。輸入勞工？講笑咩，建制派嘅工聯會民建聯誓死反對，本土新左翼唔會應承，泛民嘅經濟政策一貫左傾，特區政府對輸入勞工呢項建議，諗也不敢諗。客觀結果就係建造成本不斷上升，樓價易升難跌，正中地產發展商下懷。