【本報訊】由雨傘運動到立法會選舉，短短不過兩年，羅冠聰已由被控闖入政府總部，到堂而皇之走進旁邊的立法機關。逾5萬票的支持，打造香港史上最年輕立法會議員；23歲的嶺大生，出身去政治化家庭、成長於左校，如果劉曉波沒有獲諾貝爾和平獎，他未必關心政治。主張民主自決之時，他亦關心內地維權，表明支持平反六四。
記者：許偉賢
政總外連接港鐵站的天橋，傘運時瀰漫公僕投訴出入受阻的怨氣；兩年後重返舊地，傘運核心之一的羅冠聰，卻接連獲路過人士打氣。羅冠聰坦言被逾5萬得票「嚇親」，原預算爭港島第六位尾席，到高踞得票第二位，他相信與論壇表現穩重、社會賢達推薦有關；團隊的努力，例如設深宵街站見夜歸人，也打動不少選民。
支持平反六四議案
選票盛載的一份傘運精神，當然是主因。「好多人係想有個撐傘嘅人喺議會，係集體回憶又好、係創傷都好，都係希望有人喺議會內，活生生見證呢個能量，去延續呢份精神，始終呢件事，係近年對香港最大影響嘅事。」
生於刻意去政治化的家庭，就讀「紅底」的香港教育工作者聯會黃楚標中學，卻在2014年成為民主運動的領航人之一。羅冠聰政治啟蒙在中六，當年2010年劉曉波奪諾貝爾和平獎，「嗰時覺得攞到獎應好偉大，但佢去唔到領獎喎，我當時諗點解？」校長更成為他找答案的動力，「第二朝校長仲喺早會詆毀劉曉波，話佢係一個衰人，咁就引起我強烈好奇心，上網睇吓，見到佢為大陸人權付出好多，但點解喺呢個制度下，會俾一個中學嘅校長咁樣講佢？」
當時他是辯論隊一分子，因為辯題而多加留意社會議題，「發現香港真係好多問題」，漸漸懂得分是非黑白；相約朋輩到維園參加六四集會，大學時期積極投入社會運動。
立法會若提出平反六四議案，他表明支持；有別於不少本土自決派，羅關心內地問題，不贊成完全切割，例如維權律師被迫害，「佢哋同我哋都係有一套共同價值，喺中共下受迫害、想反抗成個政權……佢哋嘅反抗命運，同我哋城市嘅命運或多或少都係相連……我唔覺得可以輕易話唔理或者唔聲援」。但他強調：「當然香港嘅民主進程，係我哋優先要關注，要逐點逐點去疏理，例如新界鄉紳問題（涉黑恐嚇），都係推進民主嘅一個阻礙。」
「資深議員開會瞓覺」
有質疑指他年紀輕、閱歷淺，無法勝任議員工作，這位最年輕議員回應時擲地有聲：「議會好多有資歷嘅議員，開會都係瞓覺；最重要係你呈現乜嘢態度、能力同信念」，他強調人生閱歷也應講求質素，「過去兩年我經歷咗好多波折，令我急速成長」。
在他而言，年輕非但不是包袱，更提供年長者未必想到的角度，「好似傘運，對大人嚟講，覺得你哋班細路仔唔識死；但我哋嘅角度係，有時係要有啲突破、要更進取」。
未來4年任期，他關注政制發展，亦專注大專教育議題；議會抗爭有否底線？「我唔係一個害怕衝突嘅人」，但他明言，要留意不斷升級的抗爭行動，是否真正能阻擋惡法，「例如佔領主席枱，轉間房其實又可以開會，下次甚至唔畀你入嚟，連拉布嘅機會都冇埋」。他強調議會抗爭之時，更重要是加強連結議會外的民間力量。
羅冠聰小檔案
年齡︰
23歲
學歷︰
‧ 畢業於香港教育工作者聯會黃楚標中學
‧ 現為嶺南大學文化研究系四年級生
從政經歷︰
‧ 2014年9月重奪公民廣場，揭開傘運序幕
‧ 2015年3月當選學聯秘書長
‧ 2016年4月成立香港眾志，擔任主席
‧ 2016年9月於港島區立法會選舉以逾5萬票當選
資料來源：《蘋果》資料室