10月1日煙花匯演當晚9點喺維港上空舉行，今年匯演有8幕，足足長23分鐘，發放23,888枚煙花，認真好意頭！除咗黃河上游同獅子山下，仲有其他特別主題，例如功夫、火之舞同海之歌。
講到最有睇頭，可能係第5幕火之舞。呢一幕會有「旋龍」效果，煙花會高速喺空中旋轉，好似條活龍喺天空飛，亦模仿滿族傳統舞蹈入面舞動緊嘅火炬一樣，好有動感。以往煙花有笑哈哈圖案，今年第7幕嘅海之歌則首次出現立體水母同浮游生物煙花！
設計煙花嘅負責人話，今年匯演選材講吓黃河、講吓海，純粹以藝術角度出發。佢亦話因為內地煙花生產商6月至8月停產，所以要分拆定單，令成本比以往高。
今次嘅煙花匯演同晚會預計要用800萬，由海南省港區政協委員聯誼會獨家贊助。