第六屆亞洲大學生男子籃球錦標賽，噚日開始一連六日喺蒙古烏蘭巴托舉行，港隊今次派出由四間大專院校共12名大學生組成嘅聯隊，噚日喺首場小組賽對住得七名球員參賽嘅南韓，最後狂炒對手38分贏109:71，旗開得勝。
今屆亞大籃有七支球隊參加，港隊抽籤後被編入A組，同中國、南韓爭取兩個出線名額。港隊首場面對上屆季軍戰嘅手下敗將南韓，據講由於南韓好多半職業球員要備戰即將開季嘅國內聯賽KBL同選秀會，今次只係派出檀國大學嘅學生出戰，實力同上屆有周健宏助陣嘅明知大學有啲差距，結果有梁兆華、蔡再懃等多名甲一球員助陣嘅港隊半場已經領先26分，最後贏109:71。
教練譚偉洋賽後好滿意球隊表現：「球員嘅集中度好高，加上對方只得七名球員，防守部署都做到，利用全場緊迫，防守反擊都做得好好，所以好早可以拉開比分。」港隊聽日就會挑戰中國，今日因工作而要先返港嘅阿洋話，會把握時間睇中國對南韓嘅比賽，之後再睇點部署；希望港隊之後可以打得更好，相信出線冇問題喎。