幾年前，曾華倩不時被拍得身穿露腿短裙仔、戴黑超去九龍城買餸，養生之道係夠瞓(唔使開工嗰陣係十點瞓，要開工嗰陣都盡量十二點覺覺豬)，保養有道，即使年過半百，仍然Keep到陣少女味。
十一年前，即係2005年，曾華倩仲同細佢近十年嘅馬國明擦出愛火，兩人由電視城canteen食到鯉景灣撐枱腳，低調交往一年即地下情「上水」，當時更有傳媒拎住馬國明張相，問當時只得6歲半嘅Martin，問佢認唔認得「馬國明哥哥」，報道指當時Martin小朋友輕輕點一下頭，之後記者再問佢：「見過馬國明哥哥未？」Martin小朋友話：「係呀……」，之後便被女傭及司機抱回寓所。
眨下眼就十一年，42歲嘅馬國明喺噚大結局嘅《為食神探》扮Cute已經好冇說服力，魚尾紋綻放；曾華倩亦難以避免歲月洗禮，近年已鮮有公開露面，亦絕少更新微博貼新相。之前有傳媒影到佢，指其現老態乜乜乜，其實人人都會老，係咪？