農曆七月十四日中國鬼節過咗一個月，大家有冇特別怪異奇遇？如果冇但又想試吓嚇破膽嘅滋味，萬聖節前不妨考慮到訪迪士尼樂園，皆因迪士尼故事中嘅惡人會擔大旗，喺園內鬼聲鬼氣，陪大家過西洋鬼節。
上海迪士尼樂園今年開幕搶客，香港迪士尼為咗吸引旅客，即日起至10月31日推出日夜兩場反轉迪士尼慶祝活動。
日間米奇同好友會舉行萬聖節大派對，米奇同米妮化身成萬聖之王及王后，同高飛喺3個巨型南瓜花車上出巡。迪士尼熊Duffy老友貓畫家小東尼Gelatoni更首次現身萬聖節活動。
米奇南瓜等你selfie
越夜越精采，晚間仲有嚟自24個不同迪士尼故事中嘅惡人擔大旗，除咗入侵夜間巡遊，更佔據夢想花園，邪惡皇后同巫師會率領一眾惡人反轉夜間巡遊，巫婆變成大魔龍，吐出火燄吞噬城堡，場面好震撼。
活動期間樂園內亦遍佈大大小小鬼臉南瓜，小鎮廣場更有特大巨型嘅米奇南瓜，至啱擺甫士selfie。而樂園嘅展藝館亦會變成詭夢實驗室，怪異教授會帶領賓客走進機關重重嘅隧道同迷宮。嘩，黑麻麻兼煙霧瀰漫，鬼聲鬼氣下，都咪話唔怕。體驗完無論係咪嚇餐死，都可以喺樂園試吓佢哋嘅趣怪萬聖節美食。購票詳情參閱 http://www.hongkongdisneyland.com/zh-hk/ 。
李八方
mailto:[email protected]