港台王牌節目《城市論壇》噚日復播，點知向來直播節目嘅無綫揮劍斬情絲，唔再一如過往卅幾年逢周日中午12點喺翡翠台同《城壇》愛恨交纏，粉絲可能因此傷心鳥，好在仲有識貨之人，《蘋果》噚日直播，吸引累計逾21萬人次觀看，連主持人蘇敬恒都好滾動，大讚《蘋果》全程冇廣告，認真有趣喎！
唞暑後嘅《城壇》，首集討論選舉後嘅立法會新格局，兩位地區同功能組別票王，包括新西朱凱廸以及超區鄺俊宇同場現身，連同民建聯港島區候任議員張國鈞同新東落選嘅自由黨李梓敬，拍住蘇B撐起《城壇》。
節目開始前除咗切燒豬祝願新一季順利，亦向觀眾大派蛋形朱古力，唔少常客好似大陸朱繼續捧場，但近期因為「娥頸橋之戀」而爆紅嘅陳玉娥冇現身，有在場人士指娥姐可能去拍拖！
企鵝男學Tree根爆金句
無綫當《城壇》係草，證明佢哋走寶，好似企鵝男張國鈞噚日繼承鍾樹根「金句王」本色，將「劍拔弩張」講成「劍弩拔張」，都好有可觀性啦！雖則港台31台會同步播放，但蘋果動新聞網站同fb噚日亦直播，就連平時廣告時段冇直播到嘅「咪後」爭拗，亦畀大家睇埋。
噚日累計21萬人次透過《蘋果》睇直播，蘇B話好開心，佢話市民𠵱家睇節目模式變咗，後生仔都未必鍾意坐定定等夠鐘睇電視。而冇咗無綫，節目長咗近5分鐘，可以多啲台下發言。唔少網民要求《蘋果》每周直播，八方聽聞同事努力中，凡事有可能。
識睇睇留言
Vivi Cheng：TVX連有收視保證節目都唔播，抵佢收視及廣告繼續跌，跌，跌！
DeeDee Ooz：《蘋果》可因應每集剪啲精采位，吸引人上RTHK網睇。自己傳媒自己救!
Da da Chan：西環真係好on9，收編所有媒體，乜都唔畀做，結果所有節目和觀眾去晒蘋果網，蘋果更加壯大。
Gamegame King：大台已現死亡徵兆，死因是只得一種顏色，凡人沒法看懂。
Wilson WK：哎喲！原來唔使喺CCTVB睇城市論壇，正咁多㗎！真係多謝CCTVB停播，唔使再污染城市論壇！
資料來源：《蘋果》網頁及facebook
李八方
mailto:[email protected]