周潤發雖然61歲，但係城中美魔男點少得佢，飲食健康，喜愛行山嘅佢近呢年幾愛上跑山，仲有名師健身教練貼身教路，陪佢上山緩步跑，難怪身形收得更弗。呢位教練叫Anson Cha，圈中有唔少星級紅人都追隨，如郭富城、楊千嬅、詹瑞文、吳鎮宇、李治廷等，Anson喺facebook都有貼同發哥行山跑步相。
千嬅舊年個唱搵咗Anson操大隻，練得一對老鼠仔，而城城之前膝頭受損，絕不適宜做劇烈運動，之後經發哥介紹Anson畀佢做復康療程，令城城唔使做手術都可以喺今個月嘅紅館開騷狂跳，做舞台王者。而余文樂就喺拍電影《狂獸》時因身形太瘦而搵Anson幫手增加肌肉。
一粒鐘收二千
Anson貴為星級教練，收費當然有番咁上下，據知一小時以2,000元起跳，而佢嘅絕學秘技唔係一味練大隻、肌肉，亦有增肥、減肥等度身訂做課程。
曾經搵過Anson教健身嘅詹瑞文噚日喺電話度話：「Anson嘅教健身方法，好似我教演員做戲咁，令人上癮好想學戲，佢最鍾意講over all fitness，即係唔係練到一嚿嚿肉就得，要保持一個好心態，令你愛上運動。」有指Anson收2,000元一小時學費，詹Sir仍覺得物有所值。
撰文：馮仁昭