人大代表說：「唔會跟進㗎啦，這種事經常發生嘅。」唔使審，唔使估，這種事，就是：
一：地政署放生霸地鄉黑，完美示範官商鄉黑永續合作！這種事，點止橫洲，新界經常發生，唔會跟進。
二：議員選完就入中聯辦謝票，鬼鬼祟祟，大話連篇，有冇賣香港人豬仔呀？唉，這種「上契」交易經常發生，契仔契女契弟排長龍，唔跟進得咁多。
三：選票無喇喇多三百張，票站無端端自行點票，選舉主任無厘頭俾人用身份證副本投票，選民「被投票」、「被廢票」、「被剝奪超區一票」都無人理。這種事自從九月四號起，經常發生，跟個屁！
四：西環治港，要槍有槍，要砲有砲，唔順氣嗎？移民囉，呢種事經常發生，跟進都傻。
五：過去三年，黑社會撐特首撐到咁明，黑氣佔領龍和道，跟得太埋，容乜易郁埋人大代！
六：梁特要對付後生仔，搞分化，煮重後生仔米，香港遲早被烏坎，魚蛋被革命，2047被non-event，無日安寧。唔會跟進㗎啦，溫馨提示：搵夠就算，千祈冇生仔。