財爺曾俊華上星期飛咗去哈薩克斯坦外訪，奇就奇在，佢人在彼邦，但香港日日都有佢嘅消息，市傳佢下月辭職，準備選下屆特首，搞到佢喺回程航機上寫今期「財爺網誌」，寫得十分保守，成篇網誌只係一篇「哈薩克斯坦知多啲」，睇完即刻長知識咁囉。
如果大家想緊貼阿爺推動「一帶一路」嘅潮流，又比較好學，想知道當中提及嘅哈薩克斯坦係乜東東，今期「財爺網誌」應該幫到你，佢詳細講解當地人口、經濟、天然資源有幾豐富、大學學生幾叻豬云云。
財爺亦好坦白，指自己「平生首次踏足哈薩克斯坦」，呢次訪問最難忘嘅，係佢喺納紥爾巴耶夫大學（Nazarbayev University，NU）同學生交流，國家主席習近平2013年訪問哈薩克斯坦，正正就喺呢間大學宣佈「一帶一路」宏圖大計。照咁睇，財爺真係十分緊貼阿爺動向喎。