一提及香港女生，不少人都會想到參考韓星打扮的「偽韓妹」、十一分界的「偽ABC」及短褲配遮眼劉海的「MK妹」，絲打們如此百變，不知道在時裝設計師眼中，香港女生又係點？今次搵來三地時裝設計師，睇睇會唔會壠發到絲打們其他打扮方式？
韓國設計師Ko Taeyong
曾經和SHINEE等韓星合作的設計師Ko Taeyong，一系列狗仔print衛衣極受歡迎，眼見現時不少女生也作韓風打扮，他認為「大家都非常喜歡韓國潮流，當然是一件非常好的事情，但是作為時裝設計師，很多人對K fashion不太了解。」原來他覺得韓潮不是一種單一服飾，淨係學點着就未夠神粹，聽多點和感受多點韓國文化，自然有韓國味道。即是絲打們淨學得個樣，成個package未夠啦？佢就補充一句，「其實香港女生本身好有魅力」，大家要仿韓就要加多兩錢肉緊喇！
內地設計師Simon Gao
Simon Gao同唔少女星都合作過，范冰冰、李冰冰同劉嘉玲都着過唔少佢的作品。自小看香港電影成長的他，就連最近Centrestage時裝騷設計系列，創作靈感都來自70年代香港武打電影同Disco，對香港咁有情意結，不知道又怎麼看香港女生的打扮？
「包括有很多女藝人，他們自身的條件非常好，我覺得是需要更專業的人去給他們建議，他們適合甚麼。」其實唔少絲打們為跟潮流好多時忽略自己優點，outfit分分鐘揚惡藏優，真係要小心留意。眼見現時好多人都參考其他地區穿着風格，「覺得這需要大家努力，來發掘自己文化裏的美。我認為全世界的女人都應該有自信的，因為她們創造了人類。」
本地設計師Mim Mak
一向都話同性看同性是最挑剔的，看完男士們看法，一於睇睇女士點諗。設計一向兼顧實用的本地設計師Mim Mak，就覺得絲打們的打扮同國際其實好類似。「我已經睇唔到有分韓國、歐美、日本打扮，我覺得大家已經一體化了。因其實互聯網資訊流通太快，大家看的東西都是一樣。」你又幾持平，其實與其不斷參考不同地區，倒不如學吓Yves Saint Laurent所言，「Fashion fade, style is eternal」 ，找出自己風格才是王道。
記者：黃樂雯
攝影：徐振國、王國輝
