里約呢排進行緊殘奧，有一個項目係盲人足球，係畀一班失明運動員角逐足球金牌，勢估唔到英超都有盲人足球，不過就唔係球員，而係球證。上周六愛華頓主場對米杜士堡呢場波，執法球證李爾美臣就猶如盲人，走漏尼格度犯規，令米堡先開紀錄，而愛華頓反勝3:1嗰球，前鋒盧卡古掂唔到個波，不過個入球又入咗佢數。
英超賽會成日講要加強科技協助執法，不過最基本條件－－球證水準，就始終係低。李爾美臣今場真係亂晒籠，21分鐘米堡球員傳中，前鋒尼格度頂唔到個波，反而頂到愛華頓門將史基倫堡對手，搞到史基倫堡甩手俾個波入網；美臣冇吹罰不突止，仲判入球有效。
挫米堡上二哥位
不過，愛華頓呢場能夠反勝，都要多謝美臣發雞盲。今場第600場英超上陣嘅巴利，喺24分鐘門前建功追平，其實主隊後衞艾殊利威廉斯都撞低客軍門將域陀華迪斯在先。之後，愛華頓由史密斯高文同盧卡古建功，半場已經反勝3:1；盧卡古「士哥」就全靠好戲，當時恩歷克波拿斯傳中，盧卡古出腳唔知掂唔掂到，個波就溜入遠柱，佢係咁指住自己話：「我入㗎，我入㗎！」球證同賽會都順佢意判入波歸佢。點都好，愛華頓順利贏波，開季四勝一和力逼榜首曼城排第二。