去馬會食飯，碰到一位前政府高級AO，現已辭職下海嘅女士，三句不離政治，左丁山故意激佢：「乜啲AO咁大整蠱局長呀，寫封信俾吳克儉簽，祝賀『梁耀忠』成功『連任』教育界『功能界別』，錯誤連連，令見信就簽嘅局長犯下大錯，笑死政界、教育界。」
呢位AO立即為昔日同僚辯護：「我地一入政府做AO，就立即受訓，受指導每簽署一信件或文件，一定要詳細審閱內容，讀兩三次先至簽署，交俾上司嘅信件、文件，自己亦會睇多幾次，AO邊會出現呢類低級錯誤㗎，多數係局長自己叫秘書寫，自己簽嘅！」
笑話已成，不必找尋死因咯，何況一啲相熟官員話過，吳局長素來自我感覺良好，唔介意自己犯錯嘅，人地緊張啫，佢都唔知幾輕鬆。聽講有記者追問局長嘅新聞官，新聞官話祝賀梁耀忠唔關佢事喎。
局長寫信俾立法會議員，不應輕率隨便。吳局長封信，係對教師、學生嘅最壞示範，左丁山小學時候讀尺牘，如果寫信俾人，一開始就直書：「梁議員」，實會俾老師用紅筆交叉。今日北望神州，係人都識寫「尊敬或尊貴的梁耀忠議員」（注意，其實係葉建源議員先至啱），如用上古民國款式（看陳耀南之《應用文概說》），應該寫「梁議員耀忠先生鈞鑒，敬啟者」，那可以係咁意寫為「梁議員」咁輕率無體。再者，葉建源係「教育界功能組別」，並非「功能界別」議員。
見到教育局長如此中文修養，大家唔好怪中學生視DSE中文科為死亡之卷嘞，相信下任特首，即使CY連任，會請吳局長回家休息，以免連累特區政府民望。左丁山又問上述前AO：「依上屆劉江華落選模式，王國興會唔會下屆入政府做勞工福利局副局長，隨時有機會如民建聯蘇錦樑劉江華咁接任埋局長？」女AO笑笑：「你唔好嚇我啦，王國興未入過大學，又唔係番書仔，我唔知佢嘅英文程度喎。」唓，呢啲殖民地思維，中國人民站起來了，搵個繙譯跟住「王局長」就得㗎啦，新科議員容海恩自UBC畢業，又係律師，一開口咪又係嚇驚四座，令女AO嘅良人（律師）幾乎由櫈跌落地下。但點解葉劉及佢位徒弟容海恩有咁多票呢？一位富裕中產同左丁山講，佢地有不少子女在英國名校讀醫科，好支持醫委會改革條例，點知泛民出爾反爾，由支持條例轉軚變成反對條例，幫梁家騮拉布成功，故此不少中產嬲起嚟改投建制派嘅葉劉淑儀囉。