這天第三場四班1650米泥地，寶遜策「鑽之友」起步即墮馬，結果此場勝利者是杜利萊與鄭俊偉騎練組合，佢哋憑後上一攻而破的輕磅馬「好腳頭」爆冷得手，騎練及馬兒齊齊打開今季勝門，此駒近三季各一捷均於泥地，呢場單Win及組合獨贏A3，分別派127及33.5元。
今場一開閘，即有排1檔蔡約翰馬房的「鑽之友」失蹄將騎師寶遜拋倒地上，當事人可自行步返，看似無大礙，但接住第四場他的「野孩子」仍要換羅理雅策騎 。至於「鑽之友」之後空馬從包尾位置上前，入直路更係第一位，之後此駒向內斜跑，令內側馬匹須收慢，不久又向外片出，當時「合拍飛龍」喺佢外側衝緊上嚟，不過「合拍飛龍」衝咗一陣就力弱，反而大外叠的「電子鳳凰」越衝越勁，可惜最終贏馬嘅都唔係佢哋。
跑到最後幾十米，真命天子終於出現，「好腳頭」在杜利萊胯下於內叠長驅直進，完全冇受外側空馬「鑽之友」影響，衝贏空馬「鑽之友」就此爆冷打響今季頭炮，二至四名順序為「電子鳳凰」、「合拍飛龍」及全場最冷達145倍的「星光勇將」，四重彩派超過70萬元，中一蚊都收七萬，認真和味！