究竟時裝騷後台有幾忙？男模女模真係要共處一室換衫？趕頭趕命的化妝師又收埋乜嘢急救秘技？早前貿發局舉辦本港時裝大騷Centrestage，我們睇騷前深入後台，八卦一下現實中時尚裝世界有冇《American’s Next Top Model》咁juicy。
夜晚七點開騷，下晝四點後台已有不少模特兒在場預備等上妝。位位身高一米八的男女模，幾乎人人手執一份三文治和咖啡、橙汁，其實有點像演員們等埋位。採訪當日共有四位設計師的作品出場，合共有過百位模特兒上場，高峰時期差不多有七十人同處於一個五百呎的空間內，連埋拍攝記錄、公關人員和後台工作人員，認真擠迫。不過人多未必手腳亂，眼見每人各司其職，一個模特兒的妝容平均十至二十分鐘搞掂，快手得很。同場更見到曾與Marc Jacobs、3.1 Phillip Lim及Christopher Kane等設計師合作的著名化妝師Jane Richardson親自落場為模特兒作最後調整，她更透露接下來秋冬顯色唇妝屬大熱，叫記者入定貨咁話。
化完裝食完嘢，接近六點都係時候換衫上場。是次換衣間按不同設計師而分開，內裏冇特別間格，清一色純白加幾個衣飾排架，都幾⋯⋯空曠，咁咪好容易一眼望穿晒。「其實要除就除，冇問題的，每個人有咩我都有咩，係咪先？」曾踏巴黎、倫敦與德國時裝天橋的伍靜麗（Angie）從容不迫地說，「有時候無論有男生抑或女生在場，都係咁樣換，講真，後台咁急你冇時間去望其他人。」見平時紐約、米蘭、巴黎及倫敦時裝騷閒閒地每個collection都40個look，後台忙到眼都唔得閒眨，更遑論有多餘時間周圍望吧！
台前看騷或者只是數十分鐘的事，背後籌備功夫卻其實集萬家心血。下次有機會入場睇騷，記得留心欣賞呀！
記者：黃樂雯
攝影：徐振國、王國輝
