曾代表香港征戰亞運沙灘排球比賽的江卓儀（Sonia），2011年因為經濟壓力而放棄了心愛的沙排「轉行」當護士，從此過着只得工作沒有靈魂的鹹魚生活。直至去年，Sonia辭去護士工作，重投沙排懷抱，鹹魚碰上水就變回一條生猛游水魚。
回想當初放棄沙排的原因，Sonia無奈表示：「因為香港做運動員，如果唔係去大型比賽，所有費用都係要自費，我都要生活，所以咪放棄。」Sonia指香港對運動員資助極為不足，過往不僅比賽(報名?)費用需自付，就連教練費，也要待她們在大型賽事中勝出才獲資助。她說：「King Sir（鄭景亮）真係好好，佢當時可以話係義教我哋，係間唔中我哋叻女，打到大型比賽又贏到，佢先可以分返啲教練費。」
曾經因為經濟壓力而放棄沙排，問到Sonia現時又因甚麼原因再次重回沙排球場？她說：「當時做護士人工唔差，錢係真係唔駛擔心，但我每日嘅生活就係得返工放工，攰到個人唔想郁，連跑步都唔想跑，當時就覺得應該再停落嚟休息下，所以就辭職。」Sonia指當時辭職只是想好好休息，並沒想過再重回沙排球場，直到她遇到現時拍檔、前香港排球代表隊成員方思敏（包包）。「嗰陣我去睇比賽見到包包，當時講笑同佢講，話不如我哋落場打，點知當時佢真係send message問我係咪想打返，就係因為咁而組咗隊。」Sonia笑說。
雖然現在有多份兼職在身，但Sonia仍盡量每星期練習五天，其拍檔包包直言Sonia香港沙排界一姐的美譽並非浪得虛名：「好似今日(受訪當天)咁，佢份護士兼職啱啱開完通宵更，07收工唔瞓覺就直接過嚟練波，真係好勤力，香港一姐呢個地位真係值得。」
提到二人的目標，包包表示希望能學好沙排技巧，而Sonia則指希望能打回香港頭一、二的位置，及再次代表香港出賽。