【本報訊】有「總舵主」外號的陳家洛，在龍蛇混雜的添馬江湖別有一番感受，他指特首梁振英形同「西毒」歐陽鋒，「次次出招都置人於死地，西毒鍾意放蛇，你睇吓佢身邊嘅人就知啦，馮煒光、邵善波、張志剛……」
林鄭如滅絕師太
歐陽鋒逆練九陰真經而走火入魔，陳家洛指梁振英年紀輕輕便被中共吸納作戰將：「佢（梁）睇嘅只係中國式權術政治，諗嘅唔係接近我哋香港人嘅管治」，指梁打出「港獨牌」介入選舉，「仲唔夠毒？毒招百出，西毒非佢莫屬」。
而滅絕師太獨有的震懾力，陳家洛從政務司司長林鄭月娥身上感受到，「滅絕師太好打得㗎嘛，林鄭都自覺好打得。（師太）臨死時都唔使人幫佢，林鄭都話『官到無求膽自大』」。他曾經對林鄭挑機，形容管治制度大崩壞，指對方一概否認，一如滅絕的霸氣。
相對滅絕，岳不群或更難應付，表面正氣凜然，內裏卻是偽君子：「岳不群要揮劍自宮，練辟邪劍法，仲要話畀人聽，係忍辱負重。曾俊華有啲似，好似好親民、好落地，但好多嘢，好難睇得通。」多次交手經驗令他發覺，曾俊華不會清楚表達想法，「會唔會係為咗爭奪嗰個武林盟主寶座，已經揮劍自宮咗，將寶貝畀咗中央？」至於真小人左冷禪，陳指身在西環，「好想統一江湖，用好多手段搞搞震，（中聯辦主任）張曉明啦」。
■記者許偉賢