這天沙田馬場可謂「星」羅棋布，皆因有唔少年輕明星馬列陣，好似尾場「巴基之星」咁。而第二場四班草地1200米，賀賢馬房「京京千里」今仗初出已經星味十足，事關本身係應屆本地拍賣會身價最高一駒，成交價850萬元，同歷屆拍賣會標王「北京金寶」只差50萬，結果「京京千里」配潘頓一出即狂勝。
「北京金寶」冇跑過就因健康理由退役，相反出「京京千里」初出已經交足功課，四歲馬今場由頭熱到尾，入閘後雖曾發脾氣被拖出，要重新入閘，但出閘依然好快，跟手潘頓撳韁沿途走二、三叠，走勢清風送爽，入正直路一發力，人馬已經拋離所有對手直奔終點，最終「京京千里」收韁都贏四個馬位，打響服役頭炮，更幫本地拍賣會擦亮招牌，單Win及組合獨贏A1均派15.5元。
「京京千里」馬主刘玉文（他在馬會的姓氏登記用簡體）是40來歲的內地富商，首次在港養馬順利旗開得勝，以往他極少在馬場現身，今仗賽前據知練馬師賀賢都未見過刘玉文，不過今日他卻有到場打氣及拉頭馬，藝人呂良偉亦陪伴左右，自然成為焦點。至於潘頓開季四日都有馬贏，累積六場頭馬繼續領前。
今場二至四名順序係「路路發」、「盈進」及「京城珍寶」，全屬10倍以上冷門，四重彩派五萬三千幾。