田草1000米直路賽係這天沙田日馬主要戲碼，除第四、七場外，第九場二班賽都係跑同程，卒之又係潘頓、「星」字馬同7號馬天下。
由潘頓策騎、蘇偉賢馬房7號馬「世澤之星」被捧成2.8倍大熱開跑。結果此駒一洗上季一出即勝後屢戰屢敗衰運，從1檔劣位起步，逐段移出中檔追趕，臨尾及時追過一直領放的新勝馬「歷險家」，成功在今季首仗重開勝利之門，組合獨贏A1派15元正。甄子丹愛駒「宇宙車神」在太太汪詩詩打氣下跑第三，上述三匹準一班馬返晒嚟齊入三甲。
雷神這天起停賽兩個賽日，潘頓贏到唔識停，佢第二場贏完4號「京京千里」之後，第七場起直落連勝三匹7號馬「皇仁大師」、「美麗鉅星」、「世澤之星」，個人四喜臨門，打造出今季暫時代表作，至於蘇偉賢連勝四次賽事，保持開季以來日日有馬贏。
相反今場次熱門「歷險家」上仗首戰三班即勝，呢次移師二班，結果放到最後一步不敵「世澤之星」屈居亞軍，跨季四連勝功敗垂成，呢兩駒包辦5倍大熱Q，第三名由第三熱門「宇宙車神」後上取得，第四名則係貼住外欄後上的匆出冷馬「喜益善」，四重彩派2,536元。