來自泉州嘅匯鑫小貸（1577）今日開始招股，華華對間公司就冇乜興趣，反而保薦人長江證券融資嘅背景幾特別。
長江證券融資嘅母公司長江證券喺深圳上市，喺香港做保薦人貴精不貴多，對上一隻已經係2014年上市嘅偉志（1305），當時只係集資1.84億元，超購1,222倍，成為當年超購王第四名，但股價至今累跌48%。上個月初，長證亦都第一次被聯交所「貼堂」，發回亞太網絡資訊控股嘅上市申請。
咪因此以為長江證券係二打六，傳聞阿里巴巴曾有意入股，只係最後有傳湖北省政府唔想大股東落入非湖北企業手上，所以告吹，隨即獲得上海富豪、收藏家劉益謙斥資100億元人民幣入股。劉益謙90年代炒股發迹，近年接連拍得功甫帖、雞缸杯等焦點收藏品，被稱為收藏大王。
除此之外，長江證券娛樂性都幾豐富，出過題為《你大媽不是你大媽，你大爺還是你大爺》、《你的margin你的call》、《愛得多傷人，才能夠銷魂？》、《長得帥就死得快麼？》等等研究報告，舊年1月就俾中證監湖北監管局點名批評，仲要求每季內部檢討對研究報告嘅監控㖭。
以為長證嘅故事就咁就完？未。長證舊年初有份報告叫做《俠之大者，為國接盤》，7月股災後，就成為A股21間真金白銀救國券商之一，仲要出信「暴力安撫」員工，話「太陽每天都是新的！活下來才是王道」。