周大福珠寶創辦人周至元嘅第二代向來低調，大家一般只知道佢女婿係新世界發展（017）創辦人鄭裕彤，彤叔一家又絕少提起周氏呢家親戚。難怪周至元二仔周樹堂打趣話，「如果喺街度撞見鄭志剛（彤叔長孫），佢應該唔認得我呢個舅公」。
周至元有10名子女，三名兒子當中，周樹堂排第二，（佢大家姐周翠英嫁咗畀彤叔），周樹堂早於上世紀60年代尾移居加拿大，最初喺則樓打工，後來開地產公司，佢大仔目前亦主要喺加拿大生活。
周樹堂話，彤叔曾經喺70年代叫佢回港幫手打理生意，不過佢冇興趣，「每個人都有自己鍾意嘅生活，我喺加拿大一星期打三日golf，好爽」。𠵱家幾十歲留港生活，都係覺得應該落葉歸根。
問到佢同鄭家嘅關係，佢似乎唔想講太多，佢稱呼鄭裕彤做「彤哥」。講到彤叔乖仔鄭家純，周樹堂雖然係純官舅父，但佢形容大家唔係特別走得埋。去到第三代、純官長子鄭志剛，佢就笑住話「見過鄭志剛細個，家陣如果喺街撞見，佢應該認唔出我呢個舅公」。原來如此。