退下立法會火線嘅民主黨主席劉慧卿，早前兌現承諾，以一身吊帶裙面對群眾，卿姐今日再向八方送大禮，提供一張佢喺80年代、《中英聯合聲明》簽署後出席嘅一個有關香港前途嘅論壇舊相（圖），相中嘅卿姐樣貌標致、感覺不苟言笑；當時一頭長髮，身穿公主袖外套，有啲日本主播嘅韻味。
卿姐同八方講，相中嘅佢當時喺《遠東經濟評論》做香港特派員，呢份工由1984年做到1991年，正值香港過渡期、草擬《基本法》，佢話《中英聯合聲明》當年廣為各方接受，但佢一直質疑《聲明》全程唔畀香港人參與，內容未必可以成功落實，例如係咪爭取到民主？自由、高度自治點樣可以保障到？
30年過去，卿姐話，自己當年嘅質疑，一一應驗，又話如果香港要搞自決、獨立運動，其實最適合就係當時搞。卿姐仲話，由於佢對《聲明》抱批判態度，所以當時好多論壇都邀請佢出席，發表異見聲音。