到底係咪下個月辭職選特首？一眾薯片叔叔嘅粉絲，都等得好心急喎，雖然，大家手上其實係冇票，最後都係由阿爺欽點話事嘅啫。
無回應辭職傳聞
日前對下月辭職參選傳聞回應話「有啲奇怪」嘅財政司司長曾俊華，噚日出席第一屆香港手語日啟動禮（圖），自然成為焦點人物，有記者繼續問佢幾時辭職選特首？佢笑咗幾聲之後，冇開腔回應就走人。
而鬍鬚曾席間就表情多多，極度風騷；咁又係，兩度獲得「習握手」喎，仲唔係人逢喜事精神爽？佢席間一度以手語表達「你我都學習得到」，唔知會唔會又惹嚟花生友無限猜測，話佢暗示緊特首呢個位，都唔會難到佢？鬍鬚曾又話政府已經將手語課程納入持續進修基金課程資助範圍，希望鼓勵更多朋友修讀課程，協助培訓更多手語繙譯人員噃。