昨日講及小孩子用iPad嘅Apps畫圖，可以輕易畫出一條直線，以前藝術B教書時最反對呢樣嘢，但現在大勢所趨，佢教嘅大學生、中學生個個識用Apps。Apple設計圖確係精彩活潑、悅目之至，藝術B都唔敢堅持要學生用鉛筆學素描呢啲基本功咯，因曾試過被學生評價為教書方法未追上時代吖嗎。
朋友A個女Mary（假名，現在女孩子唔肯用安妮瑪麗呢類老套英文名字）讀設計，發覺男同學用電腦畫圖，叻到飛起，軟件應有盡有，畢業後受僱於室內設計公司，聽老闆吩咐，顧客永遠是對的，設計圖最緊要可靈活修改，改到顧客滿意為止。瑪麗係少數有啲藝術執着嘅女孩，堅持用筆畫設計圖，表達自己創意，故意少用電腦輔助，於是就吃虧咯，俾僱主批評為「學院派」、「離地」，瑪麗向朋友A呻：「媽咪，老闆都唔欣賞創意嘅！我不如再去讀書，專攻藝術油畫！」
哎，細路女唔識世界艱難，香港市場細小，不少設計公司都靠晒內地客，而內地客鍾意大紅大紫，金碧輝煌，熱熱鬧鬧，或者花巧百出（例如張藝謀搞西湖），俾你設計費，當然你要聽話啦，總之要識撈，搞大膽創意設計喎，等你成為靳棣強先至講。
朋友A話今日青年人之苦悶，不滿現狀，不滿政府，從佢個女嘅經驗可以體會得到，不願與現實妥協之理想派，最為憤怒。但最大之現實就係各行各業都要接大陸訂單，緊貼中國市場，否則冇乜生意好做。年青科技人辦科網，靠香港七百萬人就死梗，初創企業嘅老闆個個知道，譬如一隻手機遊戲，香港能有多少年青人、中年人下載？受內地歡迎嘅話，下載量以千萬計，規模大大不同，是故二十幾年前照抄任天堂，製造中國版本小霸王而發大達嘅段永平，近兩三年拿着美國護照返回珠三角製造OPPO、Vivo手機，又試成為世界第四大手機商，僅次於三星，蘋果，華為，皆因中國市場一hit中嘅話，收入驚人也。香港新興政治團體「本土新左翼」人士可能對中國市場嗤之以鼻，但佢地入咗立法會，就要面對現實嘅啦，否則四年後咪又變成李卓人、黃毓民！與現實妥協並不可悲，除非你要搞流血革命做烈士，或者為憤怒一世嘅「懷才不遇」人物。從街頭鬥爭走入議會，呢個過程本身已經係一種妥協。年青理想派如Mary或者對搞政治冇興趣，但從設計學系走向社會打工，亦係要調整心態。