【一周必看】曾經話過CY係完美嘅頭號梁粉陳玉娥，同公民黨楊岳橋嘅一張世紀合照被人瘋狂改圖，娥姐唔嬲不特止，仲非常多謝一眾網民（亦即係花生友）嘅支持，令佢成為Yahoo搜尋榜候選人排名第一位，做咗網絡紅人咁話，「就算鬧我都係開心」。
人紅自然就有偶像包袱，好難暢所欲言。有記者問娥姐點睇同岳少嘅合照喺fb洗版？娥姐即時耍手擰頭，「我知道你哋問乜嘢，好多人send咗畀我睇，好多傳媒想約我做專訪，預咗幾版，今日唔講喇」，話基於公平原則，記者想問就要排隊，把口點撬都唔開！
講起選舉娥姐就嬲豬，聲稱自由黨周永勤棄選，係源於新西票王朱凱廸搵人假扮京官嚇佢；又話早幾日搭車講電話提到呢件事，車上乘客同司機係朱凱廸「棋子」，聯手「禁錮」佢成粒鐘。講到咁大，娥姐有乜證據？佢話有啲嘢唔使講咁白，唔怕被人告誹謗，歡迎朱凱廸同佢公開對質喎。