上周五英超大戰，利物浦作客車路士繼續有好表現，以2:1贏波結束車仔喺英超嘅不敗走勢。紅軍今季已經先後贏過上屆冠亞軍，𠵱家作客贏埋有大衛雷斯踢到爆鼻嘅車仔，相信再冇人夠膽話今季英超只係雙曼之爭。
中堅洛夫雲喺17分鐘接應傳中，首次為利記喺英超建功，到36分鐘車路士解圍不遠，佐敦軒達臣喺禁區外截到個波，隨即離門30碼「謝四式」勁射入網，拉開比數到2:0。軒仔近季受到唔少批評，入世界波後開心到跪地剷草滑行到老遠，前隊長謝拉特遠在洛杉磯都有睇直播支持。易邊後車仔由迪亞高哥斯達入番球追近比數，但始終避免唔到要吞干地上任後嘅首場敗仗。
紅軍經過五輪聯賽後，已經先後作客過阿仙奴、熱刺同車路士三大倫敦球會，拎到兩勝一和，仲曾經大勝李斯特城。領隊高路普話：「我哋踢緊地獄足球，可觀性十足。」
