澳洲年輕騎師祈普敦剛周五在旺角大球場參加「騎師及足球名宿表演賽」，代表「雷神邀請隊」，法定時間後12碼突然死亡階段，祈普敦喺第三輪主射，腳軟軟射失，令「雷神隊」即時輸畀「桂神隊」，做咗罪人囉。
好在嗰場只係表演賽，冇乜人有真正損失，但周日(18日)敦敦幫名牌廐主大摩搏馬，自然明白唔可以再做罪人，不能累及大摩、馬主及捧場馬迷。呢日敦敦就主動到場，親自為大摩旗下的甄子丹愛駒「宇宙車神」踱步操練，係敦敦今期十匹座騎中，唯一賽前一日佢自己親操嘅馬，足以反映此駒喺敦敦心目中嘅分量。
「宇宙車神」三戰同程1000米直路賽獲兩捷，包括一次大勝令對手食塵，而落第一役只因慢閘，但最終亦輸唔遠，呢項路程戰績咁勁，唔怪得敦敦今朝咁緊張，係都要操番課先安樂啦！