第27屆香港同志影展（HKLGFF）將於9月17日至10月2日舉行，香港同志影展協會安排了多部不同國家的同志電影，在PALACE ifc、The ONE、電影中心等百老匯院線播放，希望以電影藝術宣揚平等機會的重要性，並消除對不同性向人士的歧視及誤解。雖然香港普遍對同志的態度比較保守，但本地其實都有不少為人熟悉、以同志故事為主軸的電影作品。以下五部同志電影，相信你未睇過都一定聽過！
1.《春光乍洩》（Happy Together）
提到香港同志電影，相信好多人都會第一時間諗起哥哥張國榮、偉仔梁朝偉擔正嘅《春光乍洩》。電影講述同性戀人黎耀輝（梁朝偉飾）同何寶榮（張國榮飾）喺阿根廷分開、重遇、難離難捨嘅經歷。最多人討論的，不外乎哥哥同偉仔精湛又到肉嘅演技，唔少人更懷疑兩人戲假情真！《春》除令偉仔在第17屆香港電影金像獎摘下影帝殊榮，更是香港特區十周年電影選舉中獲「最難忘電影獎」的電影，非常架勢，未睇過嘅一定要睇媖！
導演、監製：王家衛
主演：梁朝偉、張國榮
上映年份：1997年
2.《基佬四十》（A Queer Story）
《基》將喜劇配上同志元素，爆位無疑係平日正正經經的林子祥，要同陳小春飾演同志情侶，Gimmick十足！未出櫃嘅羅家聲（林子祥飾）為逃避現實，居然同青梅竹馬嘅朋友談麗泉（伍詠微飾）求婚，深愛羅嘅男友Sonny（陳小春飾）究竟會點做？留番畀大家慢慢睇！
導演：舒琪
監製：高志森
主演：林子祥、吳鎮宇、陳小春、伍詠薇、舒淇
上映年份：1996年
3.《無野之城》（City without Baseball）
片名「野」字來自日文「野球」，即係棒球咁解，故事根據香港棒球代表隊的真人真事改編，只有小部份愛情關係（如香子俊有同性戀傾向）屬虛構。最特別係，電影由代表隊嘅真實成員演番自己，講述球員梁宇聰同香子俊曖曖昧昧嘅兄弟情，以及當中嘅恐同情緒。《無》票房麻麻，但就惹來電影同文化界關注，為雲翔「極限三部曲」打下強心針。
導演：雲翔、劉國昌
監製：雲翔
主演：梁宇聰、香子俊
上映年份：2008年
4.《永久居留》（Permanent Residence）
雲翔「極限三部曲」的首部曲，由雲翔自編、自導，故事唔少內容都係佢親身經歷。電影講述男同志雲海（李家濠飾）同直男林風（洪智傑飾）若即若離嘅同性情侶生活，又將「死亡」貫徹喺成套戲入面，令電影講同性戀之餘，亦有探討死亡嘅哲學味道。另外，《永》亦出咗本影集，由下部曲《安非他命》主角彭冠期代替兩位男主角拍硬照，相片情節、佈景同電影版本一模一樣。
導演、監製：雲翔
主演：李家濠、洪智傑
上映年份：2009年
5.《安非他命》（Amphetamine）
片名語帶雙關，一方面係毒品名，另一方面又可以解讀成「難道這不是他的命運嗎？」。集跳樓、強姦、裸體拷問、雞姦等情節於一身的《安》，尺度比《永》更大膽，更獲選為第34屆香港國際電影節閉幕電影。雖然電影通過檢查，並列為三級片，但影視處之後居然要求上映版本，要刪剪戲中舉足輕重嘅雞姦情節，令雲翔好不滿，仲寄埋信向時任特首曾蔭權投訴。
導演：雲翔、劉國昌
監製：雲翔
主演：彭冠期、白梓軒
上映年份：2010年
香港同志影展網站： http://www.hklgff.hk/zh-hant
播放電影簡介： http://www.hklgff.hk/zh-hant/programme
電影場次一覽： http://www.hklgff.hk/zh-hant/calendar
記者：李煒汯