上周六英超，曼城依然獨領風騷，喺主場迎戰般尼茅夫輕鬆以4:0擊敗對手，由哥迪奧拿領軍下繼續全勝，繼上季後再次喺英超開季五戰全勝。
哥帥喺呢場波稍作變陣，除咗阿古路仲停緊賽唔出得外，中堅史東斯亦都可以休息吓，由高拉洛夫再次串演中堅。今場般茅已經盡晒力，借將韋舒亞第一次正選，但對曼城嘅威脅始終有限。曼城喺15分鐘由奇雲迪布尼主射罰球先開紀錄，10分鐘後伊恩拿祖接應史達寧橫傳一射入網，近一星期連續三場都有波入。下半場再由史達寧同根度簡各建一功助曼城大勝，喺英超五戰全勝繼續穩坐榜首。
衞冕嘅李斯特城喺上周三歐聯大勝布魯日之後，返嚟英超又贏，上周六迎戰般尼，由新兵施利文尼梅開二度下贏3:0。但上季另一黑馬韋斯咸就唔知搞乜，繼續沉淪以2:4作客輸畀西布朗。